Hei mahi pānui 7-3

Pānuitia ngā kōrero a Te Horetā e whai ake nei, ka whiriwhiri ai i te kupu kei raro iho e ōrite ana te tikanga ki ia kupu kei ngā rārangi tuatahi. Me tō e koe te mea o te rārangi tuarua ki te mea e tika ana o te rārangi tuatahi. Hei te mutunga, pāwhiritia te pātene kia kitea mehemea kua eke panuku koe.

Ka noho rā mātou i Whitianga, ka puta taua kaipuke nei ki reira, ka kite atu ō mātou kaumātua i taua kaipuke, ka mea rātou he atua, ā, he tupua ngā tāngata o taua kaipuke, ā, ka tū te kaipuke, ā, ka hoe mai ngā poti ki uta, ka mea aua kaumātua, ‘Koia anō he tupua, he kanohi kei ngā murikōkai, inā e hoe tuarā mai ana ki uta.’

Ka ū mai aua tupua ki uta, ka mataku atu mātou, ngā wāhine me ngā tamariki, ā, ka oma mātou ki te tahora. Ko ngā toa anake i noho i aro atu ki aua tupua. Ā nō ka roa, ā, kāhore kau he hē o aua tupua ki ō mātou toa, ka taki hokihoki mai mātou, ā, ka mātakitaki ki aua tupua, ā, ka mirimiri ō mātou ringa ki ō rātou kākahu, ā, ka mihi mātou ki te mā o ō rātou kiri me te kahurangi o ngā kanohi o ētahi.

Ka mahi, ka kohi tio aua tupua, ā, ka hoatu he kūmara, he ika, he roi e mātou ki aua tupua, pai tonu mai rātou, ā, ka noho mātou, ngā wāhine me ngā tamariki, ka tunu pipi mā aua tupua, ā, ka kite atu mātou e kai ana taua hunga i te kūmara, me te ika me te pipi, ka ohomauri mātou, ka mea, ‘Ehara pea i te tupua pēnei me ngā atua māori nei, inā hoki e kai ana i ngā kai o te ao māori nei.’