He mahi atu anō – Te kimi kupu

Kei raro iho ko tētahi wāhanga kōrero mō Ngāti Whātua. Whai muri iho ko tētahi rārangi kupu, ko tāu mahi he kimi i ngā kupu Māori e ōrite ana kei roto i te kōwae kōrero e hāngai ana ki ērā kupu kua rārangitia.

Ka hinga tēnei parekura a rātou, ka hoki anō ki Kaipara noho ai. Kīhai i roa ki reira, ka hoki anō ki te tauā, ki Te Wai-o-hua, ki Tāmaki, e ono tekau o rātou. Ka haere mai, ā, ka tae ki Pītoitoi. Ka mā te waka. Ka hoe, ā, ka tata ki Ōkā. Ka whakapapa ngā tāngata ki roto ki te riu o te waka, ka uhia ki te harakeke kia ngaro ai. Tokorua ngā kaihoe o te waka, kotahi i te kei, kotahi i te ihu. Ko ngā tāngata katoa kei te waka e takoto ana, ka hoe nei aua tāngata tokorua nei, ā, ka mahue he pā ko Taura-rua, ko Whakatakataka, ko Toka-purewha. Ka tata ki Kohi-marama, ka ū ki uta. Ka puta mai ngā tāngata o te pā ki tātahi. Kua noa, he waka hoe noa mai ki reira. Ko te aranga ake o ngā tāngata o te waka rā kei te patu, ka whati. Tērā te pā, ka horo tērā pā,a Kohi-maramara, haere tonu mai ki tētahi pā, ki Toka-purewha, whawhai tonu atu, horo ake tērā pā, haere tonu mai ki Whakatakataka, tauia ake tērā pā, horo ake. Ka pō ki reira. Ao ake te rā ka hāpainga ki Ōrākei, ki tērā pā, horo ake tērā, haere tonu ki Taura-rua, horo ake tērā, haere tonu ki Maunga-hekea, ka pō.