Exercise Thirteen

Reading exercise

He mahi pānui

Pānuitia te kōrero e whai ake nei, kātahi ka whakautu ai i ngā pātai.

He kōrerorero:

Kua hui mai a Kataraina rātou ko Amokura, ko Paora, ko Puti, ko Tāmati ki te kura ki te mahi moni. Ko Puti te kaiwhakahaere.

Puti: Whakarongo mai koa! Kua tata tā tātou tauomaoma te tīmata. Tekau meneti e toe ana. Kia kama!

Amokura: Kia teretere mai koutou. Tīkina ō koutou hū, ā koutou pātara wai me te pani rā. Paora, tīkina atu koa ōku hū.

Paora: Āe! I a au e tiki ana i ā tāua taputapu, māu e hoatu te koha ki te kaiwhakahaere, nē?

Amokura: Āe.

Kua oma a Tāmati ki te motokā.

Kataraina: Tāmati, taihoa e oma atu!

Tāmati: Tēnā, kia horo! Kei te whāwhai au.

Kua hoki mai a Paora me ngā hū o Amokura.

Paora: Anei ōu hū, e kō.

Amokura: E hoa! Koia nei anake ō hū?

Paora: Ehara! He hū anō ōku. Anei!
He pai ake ōku kamupūtu i ōu hū.

Amokura: Hei aha tāu!

Tāmati: He pātai tāku. Ā hea tātou tīmata ai?

Kataraina: Ākuanei.

Puti: Whakarongo mai koutou. Anei ngā ture mō tēnei whakataetae omaoma.
Tuatahi, kaua e whakawhiti i te huarahi.
Tuarua, kaua e mahi tinihanga, nē Paora?
Tuatoru, me noho ki waenganui i ngā pou.
He pātai ā koutou?

Amokura: Āe, he pātai tāku. Pēwhea te roa o te omaoma nei?

Puti: E rima kiromita te tawhiti mā ngā tamariki, ā, tekau kiromita pea te tawhiti mā ngā pakeke.

Paora: Pai kare!!! Te roa hoki o tēnei whakataetae. Ka taea e au te hikihaiki?

Puti: E hika! Māku ō taringa e kōwiri. Kaua e māngere!

Amokura: Me whakamōhio atu koe ki a Tāmati kei te tīmata te whakataetae ākuanei, e hine.

Tāmati: Me whakarārangi tātou ināianei.

Puti: Nō reira, e hoa mā, kia tūpato, ā, kia pai te haere.

Ka whakatangihia te pūtātara hei tīmata i te tauomaoma.

Kei wareware i a koe ngā piko, ngā tohu pātai, ngā ira kati me ngā tohutō i ngā wāhi e tika ana.

Kei hea rātou?

Nā wai ngā hū o Amokura i tiki atu?

Ko wai te kaiwhakahaere o te tauomaoma?

I pēhea te tawhiti o te omaoma mā ngā tamariki?


He aha te tohu hei tīmata i te tauomaoma?