Tēnā koe. Nau mai ki Te Whanake.

Tēnā koe. Nau mai ki Ngā Paki Waituhi o Te Whanake. He kōwae ēnei hei tautoko i te pukapuka matua o Te Kākano, te pukapuka tuatahi o Te Whanake hei ako i te reo Māori. Ka whai hua mehemea ka āta akona e koe ngā kōrero o te wāhanga o te pukapuka matua (arā Te Whanake 1, Te Kākano), ngā mahi rokiroki (kōpae rānei) me te pukapuka tātaki (arā Te Kākano Pukapuka Tātaki) e hāngai ana ki ia kōwae. He kōrero anō mō Te Whanake kei te paetukutuku reo rua http://www.tewhanake.maori.nz.

Tekau mā rima ngā kōwae, ā, tīmata ai ia kōwae ki te paki waituhi. Me āta mātakitaki, me āta whakarongo ki aua paki waituhi. Ka tūtaki koe ki ētahi hoa hou kei aua paki waituhi, arā ki a Te Hererīpene rātou ko Mīria, ko Eruera, ko Tarati, ko Wiremu, ko Neihana. Ka taea e koe ngā kōrero o ngā paki waituhi te pānui (me te whakapākehātanga anō hoki) kia mōhio ai koe ki ngā tikanga o ngā kupu hou ka rangona e koe. Ka rongo koe i ngā kōrero hou o te kōwae.

Kia oti te paki waituhi i a koe te whakarongo me te mātakitaki, me whakamātau koe ki te whakaoti i ngā mahi e hāngai ana ki te paki waituhi. Kei te taha katau o te mata o tō rorohiko, o tō taru paoho rānei, aua mahi. Kua rārangihia ngā mahi mai i ngā mea ngāwari ki ngā mea uaua. Mehemea kātahi anō koe ka tīmata ki te ako i te reo Māori, me tīmata koe ki ngā mea ngāwari.

Kei te pae o runga o te mata o tō rorohiko, o tō taru paoho rānei, he hononga ki ngā rauemi hei āwhina i a koe i a koe e mahi ana. Koia nei ētahi:

• He wānanga ipurangi kia taea ai e koutou ko ngā tāngata e ako ana i te reo te whakawhitiwhiti whakaaro mō te reo Māori
• He papakupu kei te ipurangi kia taea ai e koe ngā kupu hou me ngā tikanga te ako.
• He whakamātautau motuhake hei ako i te tatau, i ngā nama waea me te moni.

Anei ngā paki waituhi me ngā mahi o ia kōwae e hāngai ana ki ngā wāhanga o te pukapuka matua o Te Whanake 1 Te Kākano.

Ngā Kōwae o Te Whanake Paki Waituhi       Ngā Wāhanga o Te Kākano

Kōwae 1                                                      Te Wāhanga 1

Kōwae 2 & 3                                                Te Wāhanga 2

Kōwae 4 & 5                                                Te Wāhanga 3

Kōwae 6 & 7                                                Te Wāhanga 4

Kōwae 8 & 9                                                Te Wāhanga 5

Kōwae 10 & 11                                             Te Wāhanga 6

Kōwae 12                                                    Te Wāhanga 7

Kōwae 13                                                    Te Wāhanga 8

Kōwae 14                                                    Te Wāhanga 9

Kōwae 15                                                    Te Wāhanga 10

Haere ki te Kōwae 1 tīmata ai.